Thursday, March 20, 2014

बारामतीत या वेळी बदल घडणारचं... - महादेव जानकर


 
 बारामतीत या वेळी बदल घडणारचं... - महादेव जानकर
 
बारामती लोकसभा मतदारसंघातील महायुतीचे उमेदवार, राष्ट्रीय समाज पक्षाचे प्रमुख महादेव जानकर गेल्या वेळी माढा लोकसभा मतदारसंघातून केंद्रीय कृषिमंत्री शरद पवार यांच्या विरोधात लढले होते. या वेळी ते पवारांच्या कन्या खासदार सुप्रिया सुळे यांच्यापुढे बारामतीत कडवे आव्हान उभे करणार आहेत. या वेळच्या निवडणुकीबाबत त्यांनी मांडलेली रोखठोक मते...

बारामती मतदारसंघातून निवडणूक लढविण्यामागील आपली भूमिका काय आहे?
बारामतीत सत्ताधाऱ्यांकडून हुकूमशाही सुरू आहे. ही हुकूमशाही मोडीत काढायची आहे. सहकाराच्या नावाखाली घराणेशाही चालविली जात आहे. सहकारी संस्थांचे खासगीकरण करून त्या नातेवाईकांना देण्याचा घाट घालण्यात येत आहे. ही सर्व कटकारस्थाने चव्हाट्यावर आणायची आहेत. सत्ताधाऱ्यांच्या या धोरणाला विरोध करून त्यांना सत्तेवरून खाली उतरविण्यासाठी बारामतीतून निवडणूक लढवत आहे.

सत्ताधाऱ्यांची हुकूमशाही कशी चालते?
या मतदारसंघात मतदारांना धमकावले जाते. गेल्या अनेक वर्षांपासून ही पद्धत वापरली जाते. विरोध करणाऱ्यांना त्रास दिला जातो. मतदान गुप्त राहात नसल्याने मतदार घाबरतात. इलेक्ट्रॉनिक मतदानपद्धत असली, तरीही बूथप्रमाणे कोणत्या पक्षाला किती मते मिळाली हे समजते. एखाद्या गावात राष्ट्रवादी काँग्रेसला मतदान झाले नसेल, तर त्या गावाला वेठीस धरले जाते. हे सगळे बदलण्यासाठी मी उभा आहे.

या मतदारसंघात कोणते प्रश्न प्रलंबित आहेत?
या मतदारसंघातील प्रत्येक गावात सुमारे ३० टक्के नागरिक भूमिहीन आहेत. याकडे कोणीही लक्ष देत नाही. त्यांचे प्रश्न आजवर दुर्लक्षित राहिले आहेत. विशेष म्हणजे निवडणुकीत मतदान करणाऱ्यांमध्ये या नागरिकांचे प्रमाण जास्त असते. मात्र, त्यांच्याकडेच कोणी लक्ष देत नाही. पाण्याची समस्या कायम आहे.

बारामतीत झालेल्या गारपिटीचा मतदानावर परिणाम होईल, असे वाटते का?
सध्या या मतदारसंघातील परिस्थिती अत्यंत वाईट आहे. गारपिटीमुळे शेतकरी संकटात सापडला आहे. त्यांना केवळ आर्थिक मदतच नव्हे; तर कर्जमाफी दिली पाहिजे. शेतकऱ्यांना वीज माफ करण्याची आवश्यकता आहे. मतदारांच्या मनात सत्ताधाऱ्यांच्या विरोधात असंतोष आहे. तो या वेळच्या निवडणुकीत बाहेर पडल्याशिवाय राहणार नाही.

बारामतीत भटका विमुक्त समाज मोठ्या प्रमाणात आहे. आपल्या उमेदवारीमुळे काय परिणाम होईल?
या मतदारसंघात आजपर्यंत भटका विमुक्त आणि ओबीसी समाज सत्ताधाऱ्यांच्या पाठीशी राहिला. मात्र, त्यांचे प्रश्न प्रलंबित राहिले आहेत. हा समाज सुमारे ११ ते १२ लाख आहे. या वेळी हा समाज आपल्या बाजूने येणार आहे. कोणत्याही समाजातील शोषित वर्गाला मी माझा मतदार समजतो. शोषित मराठा समाज या वेळी माझ्या पाठीशी असेल. तसेच, मेंढपाळ समाज सुमारे साडेचार लाख आहे. हा घरचा मतदार असल्याने त्यांचा पाठिंबा आहे.

महायुतीचा फायदा कसा होईल?
महायुतीतर्फे उमेदवारी असल्याने मला त्याचा फायदा होणार आहे. भाजप-शिवसेना आणि 'रिपब्लिकन पार्टी ऑफ इंडिया'चे (आठवले गट) पारंपरिक मतदार आहेत. ही मते मला मिळतील. खासदार राजू शेट्टी यांच्या स्वाभिमानी शेतकरी संघटनेच्या कामाचा उपयोग होईल. तसेच, माझ्या राष्ट्रीय समाज पक्षाचे कार्यकर्ते मोठ्या प्रमाणात आहेत. महायुतीकडून यावेळी मतदारसंघातील वातावरण ढवळून टाकले जाणार आहे. त्यामुळे बारामतीत या वेळी बदल घडणारच !

- सुजित तांबडे

साभार : दै. महाराष्ट्र टाईम्स, दी.19/03/2014 मधून...
http://maharashtratimes.indiatimes.com/maharashtra/pune/Baramati/articleshow/32252678.cms

No comments:

Post a Comment